ជណ្តើរយោងខូច ធ្លាក់ពី ជាន់ទី១២ តែអព្ភូតហេតុ អ្នកជិះ ១២នាក់ នៅរស់ ទាំងអស់

ចិន៖ ហេតុការណ៍ ដ៏រន្ធត់មួយ បណ្តាលឲ្យ មនុស្សចំនួន ១២នាក់ បានរងរបួស ប៉ុន្តែជារឿង អព្ភូតហេតុ ដោយសារ គ្មាននរណាម្នាក់ បានស្លាប់ បាត់បង់ជីវិត ក្រោយពី ជណ្តើរយោង ដែលពួកគេ បានជិះ បានខូច ហើយធ្លាក់ចុះ ពីជា​ន់ទី ១២  មកដល់ជាន់ផ្ទាល់ដី តែម្តង។

តាមប្រភពព័ត៌មាន បានឲ្យដឹងថា ហេតុការណ៍នេះ បានកើតឡើង កាលពីថ្ងៃទី១៥ ខែកក្កដា កន្លងទៅនេះ នៅក្នុងអគារ Huayang International Mansion ដែលស្ថិតក្នុង ខេត្តលាវនីង ប្រទេសចិន ខណៈមនុស្ស ទាំង ១២នាក់ ដែលជាជនរងគ្រោះ ក្នុងហេតុការណ៍នោះ បានរងរបួស បាក់ឆ្អឹងជើង ឆ្អឹងខ្នង ហើយក្នុងនោះ ជនរងគ្រោះ ចំនួន ៥នាក់ បានរងរបួស ធ្ងន់ធ្ងរ ជាងគេ និងកំពុងតែ សំរាកព្យាបាល នៅមន្ទីរពេទ្យ នៅឡើយ។

ក្នុងនោះដែរ បើតាមសំដី ជនរងគ្រោះ ឈ្មោះ ស៊ាង លី វ័យ២៧ឆ្នាំ បានរៀបរាប់ថា​ នៅពេលគាត់ជិះ ក្នុងជណ្តើរយោង ដើម្បីចាកចេញពីអគារ រួមជាមួយ មិត្តរួមការងារ របស់គាត់ ស្រាប់តែ ជណ្តើរយោងនោះ បានយោល ម្តងទៅស្តាំ ម្តងទៅធ្វេង និងចាប់ផ្តើម ធ្លាក់ចុះយឺតៗ ក្រោយពេលដែល ទ្វារបានបិទ។

ភ្លាមៗនោះ ពួកគេក៏បានឃើញ ជណ្តើរយោង មានបែកផ្កាភ្លើង នៅត្រង់ទ្វារ ហើយអំពូលភ្លើង លើដំបូល ជណ្តើរយោង ក៏ស្រាប់តែធ្លាក់ចុះមក ត្រូវចំអ្នកដំណើរម្នាក់។ លោក លី បានប្រាប់ ឲ្យដឹងទៀតថា ពួកគាត់ បានដួល ទៅលើដី គ្រប់គ្នា ខណៈនោះដែល ពួកគាត់ ក៏ព្យាយាម បើកទ្វា ជណ្តើរយោង តែធ្វើមិនបានសម្រេច ហើយជណ្តើរយោងនោះ ក៏បានធា្លក់ចុះ ពីជាន់ទី១២ មកក្រោម ដល់ជាន់ផ្ទាល់ដី ក្នុងល្បឿនយ៉ាងលឿនតែម្តង។

ក្រោយកើតហេតុភ្លាមៗ ជនរងគ្រោះ ទាំង១២នាក់ ត្រូវបានជួយសង្គ្រោះ និងបញ្ជូនទៅកាន់មន្ទីរពេទ្យ ក្នុងតំបន់ ។

យ៉ាងណាមិញ ជណ្តើរយោង ដែលកើតហេតុនេះ ត្រូវបានបិទចោល និង មានសន្តិសុខយាមប្រចាំ នៅខាងមុខ ផងដែរ។ ចំនែកឯ មូលហេតុ ដែលបណ្តាលឲ្យ មានហេតុការណ៍ នេះកើតឡើង កំពុងតែត្រូវបាន ក្រុមបច្ចេកទេស ស៊ើបអង្កេត។

តាមប្រភពដដែល បានឲ្យដឹងថា ជណ្តើរយន្តនេះ ត្រូវបានបង្កើតឡើង ដោយក្រុមហ៊ុន Toshiba Elevator និងដាក់ដំណើរការ ក្នុងអគារនេះ អស់រយៈពេល ១៥ឆ្នាំ មកហើយ ៕