ជាងម៉ាស៊ីនម្នាក់ អាចជាប់គុក ៣៧ឆ្នាំ ក្រោយពេលមើលងាយសត្វឆ្កែសំណព្វចិត្តស្ដេចថៃ

(បាងកក)៖ កម្មកររោងចក្រម្នាក់ត្រូវបានអាជ្ញាធរចាប់ខ្លួន និងបញ្ជូនទៅកាន់តុលាការ បន្ទាប់ពីបានប្រើពាក្យមិនសមរម្យចំពោះសត្វឆ្កែសំណព្វចិត្តរបស់ស្ដេចថៃ តាមរយៈបណ្ដាញសង្គម Facebook នេះបើយោងតាមការចេញផ្សាយរបស់សារព័ត៌មាន The Telegraph ចេញផ្សាយនៅថ្ងៃទី១៦ ខែធ្នូ។

នៅក្នុងប្រទេសថៃ គ្មាននរណាម្នាក់អាចរិះគន់ដល់គ្រួសាររាជវង្សស្ដេចបានឡើយ មិនត្រឹមតែមិនគោរពនោះទេ គឺថែមទាំងមានទោសទៀតផង។ ជាក់ស្ដែងដូចជាលោក Thanakorn Siripaiboon វ័យ ២៧ឆ្នាំ ជាជាងម៉ាស៊ីន អាចប្រឈមមុខនឹងការជាប់គុក ៣៧ឆ្នាំ ក្រោយពីបាន «ប្រើពាក្យបណ្ដុះបណ្អាប់» ទៅលើសត្វឆ្កែមួយក្បាលដែលមានឈ្មោះថា Thong Daeng ដែលជាសត្វចញ្ចឹមសំណព្វចិត្តរបស់ស្ដេចថៃ Bhumibol Adulyadej។ បន្ថែមលើនេះ លោក Thanakorn ត្រូវបានតុលាការថៃចោទថា បានព្រមាថដល់រាជរង្សស្ដេច ជាពិសេសគឺព្រះមហាក្សត្រថៃ Bhumibol Adulyadej ព្រោះលោក Thanakorn បានមើលងាយសត្វសំណព្វចិត្តរបស់ស្ដេច ស្មើនឹងមើលងាយដល់ស្ដេចដែរ។

Thong Daeng មិនមែនជាសត្វឆ្កែធម្មតានោះទេ វាត្រូវបានព្រះមហាក្សត្រថៃ Bhumibol Adulyadej សរសេរជាសៀវភៅរៀបរាប់ថា ជាសត្វ «ប្រកបដោយភាពរាបសា និងការគោរព» ជាពិសេសគឺត្រូវបានគេយកទៅថតជាភាពយន្តខ្នាត់ធំ និងល្បីពេញប្រទេសថៃទៀតផង៕