ដេវីដ ទម្លាយរឿងរកាំរកូសក្នុងផលិតកម្ម “រស្មីហង្សមាស”

ក្រោយពីការប្រកាសចាកចេញពីទ្រនំហង្សមាសតាម ពេជ្រ សោភា ជារៀមច្បងមិនទាន បា់នប៉ុន្មានផង ងួន ចាន់ដេវីដ ក៏ដូចជា ពេជ្រ សោភា ផ្ទាល់តែងទទួលរងនូវព័ត៌មាននេះ ព័ត៌មាននោះវាយប្រហារឥតដាច់ទាក់ទងនឹងបញ្ហានេះ ។

ហាក់មិនឃ្លាតឆ្ងាយពីរឿងចាកចេញនេះ លោក ងួន ចាន់ដេវីដ ដែលជាដៃគូចម្រៀងដ៏លេចធ្លោម្នាក់របស់ ពេជ្រ សោភា បាននិយាយរំឭកដល់ឈ្មោះម្ចាស់ពានលំដាប់ពិភពលោក ជាមបៀដិនា ដីលៀ នី រតនា ទៅវិញថាជាមនុស្សដែលចេះឱនលំទោន និង ឱ្យតម្លៃមនុស្សកំប៉ិកកំប៉ុកដូចលោក ដែលមនុស្សមួយចំនួនមិនសូវឱ្យតម្លៃ ។ មិនតែប៉ុណ្ណោះលោកថែមទាំងពោលជូនអំណោយឱ្យ នី រតនា មុនពេលលោកចាកចេញពីដំបូលហង្សមាសទៀតផង តែយ៉ាងណាយើងមិនទាន់ដឹងច្បាស់ពីអំណោយនោះជាអ្វីនៅឡើយ។

នេះជាខ្លឹមសារដែល“ប្រជាប្រិយ”បានស្រង់ចេញពីទំព័រហ្វេសប៊ុករបស់ ដេវីដ ក្នុងនោះលោកបានសរសេរថា “ងាកមកក្រោយតិច បងមិននឹកស្មានថាបេក្ខជនជាប់លេខមួយក្នុងកម្មវិធីពិភពលោកមួយទាំងមូល ស្រាប់តែមកចេះឱនលំទោនគោរពជំរាបសួរមនុស្សកំប៉ិក កំប៉ុកដូចបង ដែលអ្នកផងមិនសូវឱ្យតម្លៃ តែយ៉ាងណាក្តីក៏បងពិតជាអរគុណណាស់នូវការឱ្យតម្លៃមកលើបង បងអត់មានពាក្យអីច្រើនទេ មានតែប៉ុណ្ណឹង ហើយទោះជាបងឈប់ធ្វើការនៅហង្សមាស ប៉ុន្តែបងមានកាដូសម្រាប់ប្អូន ហើយបងសង្ឃឹមថាប្អូននឹងរក្សាចរិតឫកពែបបនេះរហូតតទៅ បងធានាថាប្អូននឹងជោគជ័យនៅក្នុងវិថីសិល្បៈមួយនេះ ខំឡើង!”។

យោងតាមការរៀបរាប់ដ៏មានន័យរបស់ ដេវីដ នេះដែរ បានធ្វើឱ្យមហាជនមានចម្ងល់ថា ហេតុអ្វីបានជាតារាចម្រៀងរ៉េប និង ជាអ្នកចេះតែងនិពន្ធទំនុកច្រៀងថ្មីម្នាក់ប្រចាំនៅហង្សមាស ពោលពាក្យថាជាមនុស្សកំប៉ិកកំប៉ុកដែលអ្នកផងមិនសូវឱ្យតម្លៃដូច្នេះទៅវិញ តើ ដេវីដ មានបញ្ហាអ្វីជាមួយហង្សមាស? តើពាក្យថា“អ្នកផងមិនសូវឱ្យតម្លៃ”
 លោកចង់សំដៅទៅលើបុគ្គលិកនៅក្នុងហង្សមាសឬយ៉ាងណា? ទាំងនេះវានៅតែជាចម្ងល់មួយសម្រាប់មហាជនដដែល ប៉ុន្តែអ្វីដែលយើងអាចយល់បានគឺប្រហែលជាមានបុគ្គលិកខ្លះនៅហង្សមាសដែលប្រកាន់ឫកពាមិនសូវឱ្យតម្លៃរូបលោកដូចជាការលើកឡើងនេះហើយមើលទៅ ព្រោះ មួយរយៈនេះមានព័ត៌មានថា ដេវីដ និង ពេជ្រ សោភា កំពុងមានបញ្ហារកាំរកូសជាមួយអ្នកគ្រប់គ្រងតារាចម្រៀងក្នុងផលិតកម្មរស្មីហង្សមាសម្នាក់ផងដែរ ។

ក្នុងការរៀបរាប់នេះទៀតសោត លោកក៏បានរំលេចពីឈ្មោះ នី រតនា ផងដែរលើចរិតឫកពាមិនឆ្មើងឆ្មៃ ចេះគោរពក្នុងនាមមនុស្សដូចគ្នា ហើយលោកក៏សង្ឃឹមដែរថាតាមរយៈនេះ នី រតនា ដែលជាពន្លកថ្មីក្នុងផលិតកម្មរស្មីហង្សមាសនឹងទទួលបានជោគជ័យលើវិថីសិល្បៈដ៏ត្រចះត្រចង់នេះផងដែរ ។