ត្រឹមហេតុផល ១០ យ៉ាងនេះអាចបង្ហាញថាអ្នកនឹងមិនមានជារៀងរហូត

នរណាៗក៏ចង់ក្លាយជាអ្នកមានដែរ ទោះបីជាពេលខ្លះពួកគេដឹងថាទ្រព្យសម្បត្តិមិនអាចទិញសុភមង្គលបានក៏ពិតមែន ប៉ុន្តែវានៅតែមានភាពល្អប្រសើរជាជាងការរស់នៅក្នុងសភាពក្រីក្រ។ តាមរយ:ការសិក្សាពីជីវប្រវត្តិរបស់មហាសេដ្ឋីជាច្រើនបានបង្ហាញថា ពួកគាត់មិនមែនមានទ្រព្យសម្បត្តិមហាសាលដោយគ្រាន់តែធ្វើអ្វីងាយៗដូចមនុស្សធម្មតាឡើយ គឺពួកគាត់បានឆ្លងកាត់ការលំបាកយ៉ាងច្រើនក្នុងជីវិត។ ទោះបីជាយ៉ាងណាក៏មិនប្រាកដថាឱ្យតែមានការតស៊ូ គឺសុទ្ធតែអាចក្លាយជាអ្នកមានបានឡើយ លុះត្រាតែអ្នកមិនមាន ១០ ចំនុចខាងក្រោម។

1) មិនមានការដឹកនាំខ្លួនទៅកាន់គោលដៅ

ការដឹកនាំខ្លួនទៅរកគោលដៅក្នុងជីវិតគឺជាអ្វីដែលអាចជួយអ្នកឱ្យទទួលបាននូវអ្វីដែលបានរំពឹងទុក។ ការរាប់អានជាមួយមនុស្សដែលមានការគិតបែបវិជ្ជមាននឹងជួយជំរុញអ្នក ក៏ដូចជាដឹកនាំអ្នកឱ្យរកឃើញផ្លូវដែលអាចសំរេចគោលដៅបានយ៉ាងឆាប់ និងជោគជ័យ។

2) មិនចូលចិត្តប្រាស្រ័យទាក់ទងជាមួយអ្នកដទៃ

ការរាប់អានមនុស្សជុំវិញខ្លួនគឺពិតជាមានសារ:សំខាន់ណាស់ក្នុងការជួយអ្នកឱ្យទទួលបានជោគជ័យក្នុងអាជីព និងជីវិត។ នៅពេលដែលអ្នកមានការទំនាក់ទំនងច្រើនឱកាសក្លាយជាអ្នកមានក៏មានច្រើនសំរាប់អ្នកផងដែល ព្រោះមនុស្សទាំងនោះនឹងពាំនាំមកនូវអ្វីដែលពួកគេបានដឹងមកចែករំលែកដល់អ្នក។

3) ភ័យខ្លាចការបរាជ័យ

ខណ:ពេលដែលអ្នកទទួលបានភាពបរាជ័យចំពោះអ្វីមួយ អ្នកនឹងទទួលបានបទពិសោធន៏ជាច្រើនពីវា ដែលការបរាជ័យនេះជាបទពិសោធន៏មួយដែលអ្នកមិនអាចរកទិញបានឡើយ ហើយការបរាជ័យនេះក៏នឹងបង្ហាញផ្លូវអ្នកទៅកាន់ភាពជោគជ័យនៅថ្ងៃអនាគតយ៉ាងខ្លី។

4) គ្មានសកម្មភាពស្របទៅតាមគោលដៅ

ប្រសិនបើអ្នកមិនមានគោលដៅច្បាស់លាស់ ក៏ដូចជាសកម្មភាពជាជំហានៗក្នុងការទៅរកគោលដៅដែលបានកំណត់ អ្នកប្រហែលជាគ្មានថ្ងៃក្លាយជាអ្នកមាន​បានឡើយ។ អ្នកគួរណាស់តែចំណាយពេលវេលាធ្វើគំរោងសកម្មភាព និងធ្វើវាឱ្យបានដូចអ្វីដែលអ្នកបានកំណត់ទុក។

5) ការគិតថាអ្នកដទៃអាចជោគជ័យ ប៉ុន្តែចំពោះអ្នកគឺមិនអាច

បើសិនជាអ្នកបានគិតបែបនេះ អ្នកគួរណាស់តែធ្វើការផ្លាស់ប្តូរវាចេញ។ បើសិនជាអ្នកមិនហានសូម្បីតែគិតអំពីភាពជោគជ័យផង តើអ្នកអាចជោគជ័យបានតាមរបៀបណា?

6) មានប្រវត្តិជាកូនអ្នកក្រីក្រ គឺមិនអាចទៅរួចឡើយក្នុងការក្លាយជាអ្នកមាន

មានមនុស្សច្រើនណាស់ដែរតែងគិតបែបនេះ ហើយចុងក្រោយនៃជីវិតគឺពួកគេពិតជាទទួលបានដូចអ្វីដែលពួកគេបានគិតមែន។ បើសិនជាអ្នកធ្លាប់គិតបែបនេះអ្នកគួរណាស់តែបោះបង់គំនិតនេះចេញ អ្នកអាចសិក្សាពីប្រវត្តិរបស់មនុស្សជោគជ័យ និងមហាសេដ្ឋីទាំងអស់​ អ្នកនឹងឃើញថាភាគច្រើន គឺពួកគាត់មានប្រភពចេញពីគ្រួសារក្រីក្រដូចអ្នក និងអាចក្រជាងអ្នកទៀតក៏មាន។

7) មិនមានចំនេះដឹងទាក់ទងនឹងប្រព័ន្ធ Internet

នៅក្នុងសម័យបច្ចុប្បន្ននេះបច្ចេកវិទ្យា Internet បានធ្វើការផ្លាស់ប្តូរពិភពលោកយ៉ាងខ្លាំង ហើយក៏នៅតែបន្តធ្វើការផ្លាស់ប្តូរបន្តទៀត។ ប្រសិនបើអ្នកមិនចេះប្រើប្រាស់វាទេ អ្នកនឹងបាត់បង់ឱកាសសឹងតែទាំងអស់ក្នុងការទាញយកអត្ថប្រយោជន៏ពីវាដើម្បីក្លាយជាអ្នកមាន។

8) លុយមិនអាចទិញសុភមង្គលបាន

វាជាការពិតណាស់គឺលុយមិនអាចទិញសុភមង្គលបានឡើយ ប៉ុន្តែវាអាចទិញសេរីភាពនៃការរស់នៅក្រោមការគាបសង្កត់របស់អ្នកដទៃ។

9) រាប់អានមនុស្សខុស

ការរាប់អានមនុស្សជារឿងសំខាន់ណាស់ ព្រោះវានឹងមានឥទ្ធិពលយ៉ាងខ្លាំងទៅលើអនាគតរបស់អ្នក។ នៅពេលដែលអ្នករាប់អានមនុស្សមិនល្អដូចជាមនុស្សដែលចូលចិត្តលេងល្បែង ដើរលេងចាយវាយឥតប្រយោជន៏ មនុស្សទាំងនោះនឹងទាញអ្នកទៅតាមគេដែលជាការចំណាយពេលវេលារបស់អ្នកយ៉ាងច្រើនក្នុងការធ្វើអ្វីដែលជាគោលដៅរបស់អ្នក។

10) ចង់មានឆាប់តាមរយ:ល្បែងស៊ីសង

ការចង់ក្លាយជាអ្នកមានតាមរយ:ការលេងល្បែងគឺពិតជាមិនអាចទៅរួចឡើយទាំងក្នុងអតីតកាល និងអនាគតកាល។ ក្នុងប្រវត្តិមនុស្សជាតិមិនធ្លាប់បានបង្ហាញអំពីបុគ្គលជោគជ័យដែលកើតចេញពីល្បែងស៊ីសងឡើយ ប៉ុន្តែមានតែមនុស្សដែលក្រីក្រ និងរស់នៅក្នុងភាពវេទនាព្រោះតែល្បែង។
ប្រភព៖ v-shared.com