បន្ទាប់ពីបែកគ្នាហើយ អ្នកច្បាស់ជាចង់បាន មនុស្សម្នាក់ដែល អាចប្រាប់អ្នកថា…..

វាជារឿងធម្មតាទេ នៅពេលដែលបែកគ្នាហើយ គ្មាននរណាម្នាក់ដែលមិនឈឺចាប់នោះទេ។ ទោះតែម្នាក់នោះធ្លាប់ជាមនុស្សដែលរឹងមាំកំរិតណាក៏ដោយ ក៏គេចេះយំស្រែក ខូចចិត្ត និង ពិបាកចិត្តបំផុតដែរ។
ថ្ងៃទី១ បន្ទាប់ពីអ្នកបែកគ្នារួច អ្នកច្បាស់ជាចង់អោយមនុស្សដឹងពីទំហំនៃការឈឺចាប់របស់អ្នកខ្លាំងណាស់។ ជាពិសេសមនុស្សដែលធ្លាប់តែពោលពាក្យថា «ស្រលាញ់អ្នកខ្លាំងណាស់ ស្រលាញ់ធំជាងអ្វីៗទាំងអស់» អោយគេបានដឹងថាអ្នកនៅពេលនេះគឺជិតស្លាប់ហើយ។ អ្នកឈឺខ្លាំងណាស់ ឈឺស្ទើរតែទ្រាំមិនបានទេ។ អ្នកក៏ចង់បានមនុស្សម្នាក់ដែលអាចស្តាប់រឿងទុក្ខសោករបស់អ្នក ហើយ អាចលួងលោម និង ប្រាប់អ្នកថា៖

«មិនអីទេ, អ្នកអាចធ្វើជាមនុស្សដែលទន់ជ្រាយបានពេលនេះ អ្នកអាចយំ រឺស្រែកអោយខ្លាំង អ្នកមិនចាំបាច់ធ្វើជាមនុស្សដែលឥតខ្ចោះទេ ដែលមានន័យថាអ្នកខំព្យាយាមលាក់បាំងការឈឺចាប់របស់អ្នក។ បេះដូងរបស់អ្នកអាចនឹងឯការមែននៅពេលនេះ តែមិនមែនមានន័យថាអ្នកនៅតែឯការបែបនេះរហូតទេ អ្នកនឹងអាចរកឃើញមនុស្សម្នាក់ដែលស្រលាញ់អ្នកពិតប្រាកដនៅថ្ងៃណាមួយ។ ឥលូវនេះអ្នកគ្រាន់តែសំងំអោយស្ងៀម ព្យាបាលរបួសរបស់អ្នកអោយជាសះស្បើយបានហើយ។ មិនមែនមានតែអ្នកទេ ដែលជួបរឿងទុក្ខសោក ស្នេហាមិនសមបំណង ប៉ុន្តែមានមនុស្សជាច្រើនដែល​ជួបប្រទះបញ្ហាស្រដៀងអ្នក ដូចអ្នក រឺខ្លាំងជាងអ្នក។ បាតដៃរបស់អ្នកនៅពេលនេះ អាចប្រហែលជាទំនេរគ្មានអ្នកកាន់ ប៉ុន្តែវាគ្រាន់តែជាបណ្តោះអាសន្នទេ ថ្ងៃណាដែលអ្នកជួបស្នេហ៍ពិត ដៃរបស់អ្នកនឹងរវល់ទៀតហើយ គេម្នាក់នោះប្រហែលជាកាន់ដៃរបស់អ្នកលែងទេ។ អ្នកប្រហែលជាអាចស្រក់ទំងន់ខ្លាំង រឺឡើងហួសកំរិត ប៉ុន្តែមិនជាអ្វីទេ អ្នកនៅតែស្រស់ស្អាតសំរាប់ឪពុកម្តាយ និង មិត្តភក្តិរបស់អ្នក ជាពិសេសបេះដូងរបស់អ្នកនៅតែមានពណ៌ស្រស់បំព្រង។ អ្នកប្រហែលជាពិបាកក្នុងការដើរលើផ្លូវ ដែលធ្លាប់មានគេ ប៉ុន្តែនៅពេលដែលអ្នកអាចឆ្លងកាត់វាបានហើយ អ្នកនឹងក្លាយជាមនុស្សដែលរឹងមាំបំផុត។ អ្នកប្រហែលជានឹកគេម្នាក់នោះណាស់ ប៉ុន្តែអ្នកត្រូវតែប្រាប់ខ្លួនអ្នកថា គេម្នាក់នោះគ្មានអ្វីជាប់ទាក់ទងនឹងអ្នកទៀតទេ ហេតុអ្វីត្រូវនឹកគេនោះ។ អ្នកប្រហែលជាអផ្សុកខ្លាំងណាស់ ដែលគ្មានអ្នកជជែកលេងជាមួយអ្នក តែកុំបារម្ភអ្នកអាចជជែកជាមួយខ្ញុំបាន, ខ្ញុំទំនេរជានិច្ចសំរាប់អ្នក​។ ខ្ញុំយល់ពីអារម្មណ៍របស់អ្នក ថាអ្នកពិតជាចង់អោយពេលវេលាត្រលប់ក្រោយវិញណាស់។ អ្នកចង់អោយខ្លួនឯងនៅតែជាមនុស្សសំខាន់សំរាប់គេ។ ចង់អោយថ្ងៃចាប់ផ្តើមដំបូងនៅតែ​បន្ត រហូតមកដល់ពេលនេះ។ ឈប់ខូចចិត្តទៀតទៅ! អ្វីៗហួសហើយ អោយវាទៅតាមដំណើរចុះ។ ទោះពេលនេះអ្នកធ្វើអ្វី ក៏មិនបានផលដែរ។ រឿងដែលអ្នកត្រូវធ្វើពេលនេះគឺ ទទួលយកការពិត ថាអ្នកបែកគ្នាហើយ។ អ្នក និង គេក្លាយជាអ្នកដទៃហើយ គ្មានអ្វីអាចស្រោចស្រង់បានទេ។ ទោះអ្នកឈរយំរៀបរាប់​នៅចំពោះមុខគេ ក៏គ្មានបានអ្វីមកវិញដែរ អ្វីដែលអ្នកបានគឺត្រឹមតែការឈឺចាប់ និង ក្តីអាម៉ាស់តែប៉ុណ្ណោះ។ គេមិនយល់ទេ ព្រោះគេមិនមែនជាអ្នកដែលត្រូវគេបោះបង់ ធ្វើម៉េចគេអាចយល់ពីអារម្មណ៍ឈឺចាប់មួយនេះទៅ។ អ្នកកាន់តែអង្វរ គេកាន់តែយល់ថាអ្នកជាមនុស្សដែលគ្មានតំលៃសំរាប់គេ ហើយកាន់តែចង់រត់អោយឆ្ងាយពីអ្នក។ ជាចុងក្រោយ,
អ្នកមិនចាំបាច់សួរខ្លួនអ្នកថា តើអ្នកត្រូវប្រឈមមុខនឹងស្ថានភាពបែបនេះ រហូតដល់ណាទេ ព្រោះវាអាស្រ័យលើអ្នក ថាតើចង់នៅបែបនេះដល់ណា។ ខ្ញុំនៅតែនិយាយពាក្យដដែលៗថា ការនិយាយគឺងាយស្រួលជាងការធ្វើ ប៉ុន្តែប្រសិនបើអ្នកមិនព្រមបង្រៀនខ្លួនអ្នកអោយរៀនចេះរស់នៅដោយគ្មានគេទេ អ្នកនឹងនៅតែរស់នៅក្នុងស្ថានភាពបែបនេះ។ មិនខុសទេការស្រលាញ់គឺមិនចាំបាច់មានហេតុផល​ ហើយក៏មិនចាំបាច់ចំណាយពេលទៅស្រលាញ់ដែរ ប៉ុន្តែពេលដែលចង់បំភ្លេចវិញគឺត្រូវចំណាយពេលស្ទើរមួយជីវិត​។ ទោះជាយ៉ាងណាក៏ដោយ, អ្នកត្រូវតែបង្រៀនខ្លួនអ្នកអោយចេះទទួលស្គាល់ការពិត ថាអ្នកបានក្លាយជាមនុស្សអតីតសំរាប់គេរួចទៅហើយ។ ទោះអ្នកនៅគិត ក៏គ្មានប្រយោជន៍ដែរ បានត្រឹមស្តាយ និង ខឹងគេតែប៉ុណ្ណោះ។ សំរាប់គេវិញរឹតតែមានមោទនភាពលើខ្លួនគេ ដែលអាចធ្វើអោយមនុស្សម្នាក់ស្ទើរស្លាប់ស្ទើររស់ ហើយគេច្បាស់ជាមានក្តីសុខខ្លាំងណាស់ព្រោះគេឃើញអ្នកទៅជាបែបនេះ។ ថ្ងៃនេះអ្នកឈឺចាប់ខ្លាំង ប៉ុន្តែថ្ងៃក្រោយគេម្នាក់នោះនឹងឈឺជាងអ្នក និង អាម៉ាស់ជាងអ្នក នៅពេលដែលអ្នកអាចរស់នៅដោយគ្មានគេ​ ហើយមានក្រុមគ្រួសារមួយដែលកក់ក្តៅបំផុត។ អ្នកត្រូវចាំថាមនុស្សយើងមានថ្ងៃឡើង ថ្ងៃធ្លាក់ចុះ, ដូច្នេះមិនមែនមានន័យ ថ្ងៃនេះគេឈ្នះអ្នក គេជោគជ័យមួយជីវិតទេ ថាមិនត្រូវថ្ងៃណាមួយគេក៏ជួបរឿងដូចអ្នកដែរ។ អ្វីដែលសំខាន់អ្នកត្រូវបោះជំហានដោយសេចក្តីក្លាហាន ឆ្ពោះទៅរកថ្ងៃថ្មី និង ធ្វើខ្លួនឯងអោយសប្បាយរីករាយ  រង់ចាំទទួលស្វាគមន៍មនុស្សពិតរបស់អ្នក។ ដកដង្ហើមអោយវែងៗ ហើយចង់ចាំថាថ្ងៃស្អែកជាថ្មីសំរាប់អ្នក។»
អរគុណសំរាប់ការចំណាយពេលអានអត្ថបទមួយនេះ សង្ឈឹមថាអ្នកអាចរសាយចិត្តបានខ្លះនៅពេលដែលបានអានវា។ ខ្ញុំនៅទីនេះចាំផ្តល់កំលាំងចិត្តអោយអ្នក ហើយ រីករាយនឹងស្តាប់នូវទុក្ខកង្វល់របស់អ្នក៕
ប្រភព៖​ khmer-press.com